Во текот на денот, златото се тргуваше околу 5.355 долари за унца, а среброто нешто над 115,90 долари.
Овој пресврт на пазарот ги поттикна инвеститорите на поголема претпазливост, по неколкумесечниот раст поттикнат од силната побарувачка од Кина, купувањата од централните банки и геополитичките тензии, објави Yahoo Finance.
Нагол пад по рекордни нивоа
Падот следуваше откако цените достигнаа историски врвови, што предизвика бран продажби за реализирање добивки.
Предупредувања од аналитичарите
Аналитичарите посочуваат дека корекцијата била очекувана, имајќи ја предвид брзината и интензитетот на претходниот раст. „Сè помалку има простор за понатамошен раст на цените на златото и среброто по последните рекорди“, изјави Карстен Фрич, аналитичар во Commerzbank.
Тој додаде дека инвеститорите сè повеќе ја наплатуваат добивката и дека растот е „на стаклени нозе“, посочувајќи како предупредувачки знак фактот што инвеститорите во берзански тргуваните фондови (ETF) не се приклучиле на овој тренд.
Слична оценка даде и Рајан Мекеј, висок стратег за суровини во TD Securities, кој смета дека растот на цените бил „одвоен од фундаментите“. Според него, корекцијата „одамна требаше да се случи“, а физичката побарувачка од Кина и Индија, клучни двигатели на растот, сега слабее поради екстремно високите цени.
Пазарни притисоци и слабеење на побарувачката
На падот на цените на благородните метали влијаеја и надворешни пазарни фактори. Зајакнувањето на американскиот долар и растот на приносите на американските државни обврзници го зголемија притисокот врз златото, кое не носи принос и станува помалку атрактивно во услови на повисоки каматни стапки.
Истовремено, забавувањето на побарувачката на клучните азиски пазари дополнително го ослабе импулсот за натамошен раст.
Неизвесни краткорочни изгледи
Додека дел од аналитичарите го гледаат падот како здрава корекција по прегреаниот раст, други предупредуваат на можноста за дополнителни намалувања доколку се намали шпекулативната куповина што доминираше на пазарот во последните месеци.
Долгорочните изгледи за златото и среброто и понатаму се оценуваат како позитивни, поддржани од континуираните купувања на централните банки и зголемените геополитички ризици, но на краток рок се очекува зголемена волатилност на пазарот на благородни метали.