Аталанта направи уште еден астрономски трансфер, откако се согласи да го продаде напаѓачот Матео Ретеги (26) на саудискиот клуб Ал Кадисија за 70 милиони евра, објавија италијанските медиуми. Италијанскиот репрезентативец ќе заработува дури 20 милиони евра годишно во клубот кој минатата сезона заврши четврти во првенството на Саудиска Арабија.
Неговата плата во Ал Кадисија ќе биде шест пати поголема од онаа во Аталанта, објавуваат италијанските медиуми. Ретеги пристигна во Аталанта од Џенова минатото лето во трансфер вреден 20 милиони евра и беше најдобар стрелец во Серија А минатата сезона. Тој постигна 28 гола во сите натпреварувања и додаде девет асистенции.
Неговата продажба во саудискиот клуб Ал Кадисија е вториот најголем трансфер во историјата на Аталанта. Тие заработија најмногу пред две години од продажбата на данскиот централен напаѓач Расмус Хојлунд на англискиот Манчестер Јунајтед, кој беше платен 85 милиони евра со бонуси.