ХОЛАНДИЈА е највисоката нација во светот, но генерацијата родена 2001 година е пониска од генерацијата од 1980 година, објави локалната статистичка служба.
Деветнаесетгодишни Холанѓани во просек се високи 182,9 сантиметри, а Холанѓанките 169,3 сантиметри.
Ова значи дека мажите се за сантиметар, а жените за 1,4 сантиметри пониски од генерацијата родени во 1980 година.
Фактори како што се имиграцијата и исхраната веројатно се одговорни за менување на трендот, по еден и пол век континуиран раст на нацијата.
„Во текот на минатиот век, станувавме се повисоки и повисоки, но од 1980 година тој раст престана“, се вели во соопштението на статистичката служба.
Но, не е се изгубено. Холанѓаните се уште се највисоки. Зад нив се Црногорците, Естонците и Босанците.
Холанѓанките се први, пред Црногорките, Данките и Исланѓанките.
Ова го потврдува премиерот Марк Руте, кој со 193 сантиметри често се истакнува на состаноците на Европскиот совет.
Но, зошто висината на Холанѓаните опаѓа, не е целосно јасно. Една причина е секако имиграцијата, „особено луѓето со незападно потекло“, бидејќи тие се пониски од просекот, се вели во студијата.
Но, растот исто така стагнира кај Холанѓаните чии родители, баби и дедовци се родени во Холандија.
Ова може да се должи на „биолошката граница“, но и „поради нездравите навики во исхраната кои влијаат на растот“.
Холанѓаните не беа секогаш толку „долгнавести“. На почетокот на 19 век, нацијата беше ниска според европските стандарди во тоа време и започна да расте само во 1840 -тите.
До пред сто години, највисоките во светот беа Скандинавците, а Холанѓаните го преземаа приматот во средината на 20 век.
Популарниот мит дека ова се должи на обилната консумација на млечни производи што Холанѓаните ги обожаваат е побиен од научниците.