Независниот академски синдикат (НАкС) бара Министерството за образование да ги продолжи разговорите за пакетот закони за високо образование и наука, за да се спречат непоправливи штети.
-Бараме Министерството за образование и наука да го продолжи процесот на дискусија по овој пакет-закони, со што би се создале услови за дефинирање посоодветни решенија. Инсистирањето на МОН и на Владата да ги поднесат законските решенија во планираната форма нема да овозможи зголемување на квалитетот во високото образование и науката. Напротив, тоа ќе создаде невозможни услови за реализација на високообразовната дејност, невозможни услови за напредување на младите научници и ќе предизвика сериозен упад на политиката во универзитетската автономија, стои во соопштението до јавноста од Независниот академски синдикат.
Во соопштението до јавноста дадено денес од Независниот академски синдикат стои дека вниматлено го следат процесот на создавање на новиот пакет закони кои според МОН се реформски и треба да го подигнат квалитетот на високото образование и науката.
-Како синдикат што се бори за истата цел – подигнување на квалитетот на високото образование и науката, НАкС пристапи конструктивно и во рамките на овој процес изготви забелешки за сите три нацрт-закони, кои ги достави до овластениот предлагач, МОН, како и на ЕНЕР. За жал, важен дел од нашите забелешки беа игнорирани, а нацрт-законите во нивната суштина останаа непроменети, соопшти Независниот академски синдикат.
Според синдикатот предлоените законски решенија ќе го уназадат развојот на високото образование и науката.
-Во сите три предложени текста очигледно е нарушувањето на универзитетската автономија, преку одземање на надлежностите на независните тела и нивно префрлање на МОН. Овие законски решенија не овозможуваат доволна независност во финансиското работење и оставаат простор за притисок од власта врз кадровските политики на високообразовните установи. Прашуваме – доколку меритот е критериум за вработување во ВОУ, зошто Владата не се откаже од своите патеки на влијание во кадровското управување на ВОУ? Дополнително, која е целта на централизацијата на управувањето во високообразовните установи, освен влијанието на власта преку раководните лица?, соопшти Независниот академски синдикат.
Од Синдикатот појаснуваат дека се убедени дека условите за избор во звања треба да одговараат на спецификите на различните научни и уметнички подрачја, при што мора да бидат создадени неопходни услови за нивно достигнување.
-Во предложените решенија условите не се применливи за различните научни подрачја и се тешки за достигнување од младите научници, без гаранции за соодветно финансирање и услови за работа. Наместо декларираната цел – зголемување на квалитетот, ваквиот пристап може да има погубен ефект – губење на помладиот кадар на универзитетите, стои во соопштението на Независниот академски синдикат.
Од НАкС велат дека во Законот за научноистражувачка дејност, не постои вистинска заложба за обврзувачко, континуирано, предвидливо и стратешко финансирање на науката во државата.
-Како предлагачот очекува да бидат исполнети условите за избор во звање, кои во некои аспекти ги надминуваат и оние кои постојат во регионот на пример Словенија, Србија, Хрватска, со вакво ниво на финансирање во науката во државата, кое е едно од најниските во Европа?, прашува Синдикатот.
Новата Агенција за квалитет во високото образование и науката, во која МОН ќе има директна улога, според НАкС е спротивно на европските критериуми за независност од политиката, и не може да обезбеди стручна и независна контрола на примената на законските критериуми за работа.