Министерот за здравство Беким Сали денеска информираше дека Комисијата за заразни болести препорачала намалување на изолацијата на лицата позитивни на коронавирус, од десет дена на седум.
-На мое барање денес беше свикана средба со членовите на КЗБ, при штоа разговаравме за најновата ситуација со Ковид-19. Врз основа одлуки кои се донесени во различни држави, кои се релевантни и се земаат за пример за споредување, и врз основа на нашиот Институт за јавно здравје кој ги добива на дневна база податоците, Комисијата бара да се намали изолацијата од десет дена на седум, изјави Сали за ТВ Сител.
Сали информира дека препорака на Комисијата треба да се најде на Кризен штаб во понеделник, а во вторник веќе треба да биде на седницата на Влада.
Во последните 24 часа направени се 4.021 тестови, а регистрирани се 1.172 нови случаи на Ковид-19, од кои 145 се реинфекции.
Во текот на изминатите 24 часа регистрирани се 12 починати лица: 6 починати лица од Скопје (65г, 69г, 70г, 78г, 83г и 84г), 3 од Битола (32г, 72г и 79г) и по едно починато лице од Велес (30г), Охрид (63г) и Прилеп (62г). Пријавените лица се починати во болнички услови.
Согласно Регистарот на умрени лица со дијагноза КОВИД-19 од Мој термин, пријавено е едно починато лице од Струмица (59г) починат на 15.01.2022, во болнички услови.