„Во врска со последователните навредливи квалификации кон Бугарија и бугарскиот народ од страна на функционери од Република Северна Македонија, категорично одбиваме да се вклучиме во таков неевропски и неспоив тон“. Ова го наведуваат во став од бугарското МНР и додаваат дека „нивните европски партнери се известени за неиспровоцираните провокации, кои имаат за цел, меѓу другото, да го уништат дијалогот“.
-Уште еднаш потсетуваме на клучното значење на развојот на добрососедските односи за европската иднина на Република Северна Македонија, посочуваат од бугарското Министерство за надворешни работи.
Претседателката Гордана Сиљановска-Давкова минатата недела ја посети Бугарија и се сретна со шефот на државата на нашиот источен сосед, Румен Радев. Сиљановска ја посети официјална Софија по повод гостувањето на Националната опера и балет, која во Софија ја претстави операта „Набуко“ од Џузепе Верди.
-Македонија е подготвена да гради добрососедски односи, но кога ќе се преминат црвените линии, на бугарскиот амбасадор ќе му биде врачен демарш“, рече премиерот Христијан Мицкоски пред неколку дена како одговор на прашање поврзано со отсуството на државното македонско знаме на фотографијата на претседателката и нејзиниот бугарски колега Румен Радев на нивната средба во петокот во Софија.
Темата на фотографијата на која зад двајцата претседатели се поставени бугарската тробојка и знамето на ЕУ, а отсуствува државното знаме на Република Македонија, продолжува да биде водечка тема во двете земји.
„Минимум пристојност е да се постави знамето на државата чиј претседател пристигнува. И барем човек треба да биде разумен за да го направи ова. Не е работа на Силјановска да гледа каде има и каде нема знамиња, работа на домаќинот е да покаже пристојност. Но бидејќи очигледно домаќинот не е цивилизиран, ако сакаат нека испратат протестна нота на ова што го кажувам – домаќинот не е ниту цивилизиран, ниту пристоен, ниту почитуван, така што ситуацијата е таква каква што е“, рече пред два дена вицепремиерот и министер за транспорт и врски, Александар Николоски.