Мировните сили на Косово (КФОР) предводени од НАТО во понеделникот ја предупредија Приштина по купувањето турски вооружени беспилотни летала, потсетувајќи ја дека само тие се одговорни за нејзиниот воздушен простор.
Оваа изјава на КФОР доаѓа еден ден по веста за набавка на турски беспилотни летала ТБ-2 Бајрактар што ја објави премиерот Албин Курти.
„Кога станува збор за употреба на сите видови беспилотни летала и соодветните ограничувања, дури и во однос на ТБ-2 Бајрактар, командантот на КФОР ја има главната одговорност за воздушниот простор над Косово“, се наведува во соопштението.
Курти во неделата на социјалните мрежи објави фотографии на кои стои покрај новите дронови. „Во нашиот воен арсенал ги додадовме беспилотните летала ТБ-2 Бајрактар што ги купивме од Турција“, задоволно рече Албин Курти, додавајќи: „Косово сега е побезбедно и исто толку гордо!
Многу се пишуваше за ТБ-2 Бајрактар минатата година поради неговата улога во првите фази на одбраната на Украина од руската инвазија, а беше купен од десетина армии, објави Меѓународниот институт за стратешки студии (IISS).
Косовската влада сака да ги реорганизира Косовските безбедносни сили (КБС), лесно вооружени безбедносни сили, во редовна армија со 5.000 мажи и 3.000 резервисти. Белград и неговите главни сојузници, Кина и Русија, не сакаат да ја признаат независноста на Косово.
Тензиите и понатаму се високи во Косово, по неколкумесечните бунтови во областите со српско мнозинство на север. На крајот на мај беа ранети повеќе од 30 војници на КФОР.
Курти оваа недела во Брисел треба да се сретне со српскиот претседател Александар Вучиќ, каде двете страни се под силен притисок од Европската унија да ги намалат тензиите.