Русија претрпе околу 900.000 жртви од почетокот на инвазијата на Украина пред повеќе од три години, изјави во четвртокот висок претставник на НАТО.
Според НАТО, во конфликтот што избувна на 24 февруари 2022 година загинаа до 250.000 војници.
Украина се брани од руската инвазија со широка поддршка на нејзините западни сојузници. Откако силите на Киев успеаја да ја вратат контролата врз дел од територијата што Русија првично ја зазеде, двете страни се најдоа во повеќемесечна војна на трошење, при што Русите постепено остваруваа територијални придобивки.
Според оценката на НАТО, „ситуацијата на бојното поле е сè уште многу тешка“.
„Иако не очекуваме голем пробив на украинските одбранбени линии во следните неколку месеци, дури и ако Москва продолжи да напредува, ние веруваме дека Русија ќе продолжи да го зголемува притисокот долж линијата на фронтот и врз Украина воопшто“, рекол претставникот на маргините на состанокот на министрите за надворешни работи на земјите-членки на НАТО во Брисел.
Истакнувајќи ги неодамнешните територијални придобивки на руските сили во источна Украина, вклучително и во Торецк и во близина на Покровск, официјалниот претставник рече дека Русија ја продолжува својата стратегија за „големи загуби во замена за бавни придобивки“.
Русија претрпе 35.140 жртви само во февруари оваа година, според официјалните лица.
Во меѓувреме, украинскиот претседател Володимир Зеленски рече дека го смета минатогодишното ненадејно навлегување во непријателска територија за успех и покрај општото повлекување на неговите војници од рускиот регион Курск. Киев одлучи да ја донесе војната во Русија со започнување на сопствена ограничена инвазија во август.
„Целосно е фер војната да се врати таму од каде што дојде“, кажа Зеленски во видео обраќањето. Зеленски го снимил видеото во украинскиот пограничен регион Суми, од каде украинските сили ја нападнале руската територија.
Тој додаде дека разговарал за опремата и поддршката што им е потребна со командантите на единиците кои се уште се борат во Курск.
„Работиме на заштита на нашите позиции“, истакнал Зеленски.
Само неколку квадратни километри од областа Курск се уште се под контрола на Украина.