Несоницата е чест проблем во денешно време, но една нова студија сугерира дека решението може да биде поедноставно отколку што мислиме. Истражувачи од Универзитетот Колумбија и Универзитетот во Чикаго откриле дека јадењето овошје и зеленчук може значително да го подобри квалитетот на спиењето – и тоа уште од првата ноќ.
Студијата, објавена во списанието „Здравје на спиењето“, сугерира дека јадењето пет чаши овошје и зеленчук дневно, што е во согласност со препораките на американските Центри за контрола и превенција на болести (CDC), може да го зголеми квалитетот на спиењето за дури 16%.
„Забележливо е што толку значајна промена може да се види за помалку од 24 часа“, вели д-р Есра Тасали, експерт за спиење на Универзитетот во Чикаго.
Како дознале?
Во студијата учествувале 34 здрави возрасни лица со просечна возраст од 28 години кои претходно немале проблеми со спиењето. Во текот на 201 ден, тие го евидентирале својот дневен внес на храна во апликација и носеле уреди за следење на спиењето. Анализата на податоците покажала јасна врска помеѓу внесувањето свежа храна и длабочината, времетраењето и континуитетот на спиењето.
Храната и мозокот: улогата на триптофанот
Една од причините зошто овошјето и зеленчукот функционираат на овој начин е затоа што содржат јаглехидрати, кои му помагаат на мозокот да го апсорбира триптофанот – аминокиселина што го стимулира производството на мелатонин, хормон одговорен за регулирање на спиењето.
„Луѓето често ме прашуваат дали постојат намирници што помагаат во спиењето. Оваа студија покажува дека – да, постојат“, рече д-р Мари-Пјер Сент-Онж, директорка на Центарот за истражување на спиењето во Колумбија.
Пет порции дневно – но инпомалку можат да помогнат
Иако пет чаши може да изгледаат застрашувачки, истражувачите нагласуваат дека дури и мало зголемување на внесот на овошје и зеленчук може да има позитивно влијание. Не мора да ја достигнете целата препорачана порција за да видите подобрувања.
„Малите промени можат да имаат големо влијание врз сонот. Тоа е моќно – подобриот одмор е буквално под ваша контрола“, рече Сент-Онж.