Нови тензии, навреди и препукувања на релација претседател на Советот на град Скопје, Трајко Славески и градоначалничката Данела Арсовска на денешната 19-та седница на Советот на град Скопје.
-Заради недолично однесување и навреди кон претседателот на Советот на град Скопје ѝ одзедов збор на градоначалничката Арсовска, изјави Славески.
По ова Арсовска стана и се доближи во говорницата во градското Собрание.
-Вашиот капацитет е еднаков на нула, каков што е вашиот интегритет. Имаме право на кој начин ќе се изјасниме. Вие сте тука деспот и тиранин, се изживувате. Јас имам право да одговарам на прашањата. Немате право да одземате збор на градоначалникот. Не се ова опструкции. Единствено недолично однесување во оваа сала го имате вие. Немате грам интегритет. Жално е што си ја завршивте кариерата како деспот. Директно штетите на градот со вашето однесување, рече градоначалничката.
Славески после тоа ја прекина денешната 19-та седница на Градот.
-Заради опструкции на градоначалничката ја прекинувам седницата за поставување советнички прашања, затоа што не постојат услови заради недоличното однесување на градоначалникот, одговори Славески и додаде бил наречен Хитлер од градоначалничката.
Градоначалничката на тоа додаде: „Ова е мојот дом, мојата куќа и не можете да ми го земете зборот“.