Претседателот на Србија, Александар Вучиќ, изјави денес дека не е реално Германија да го повлече признавањето на Косово и оцени дека Србија дефинитивно ќе се соочи со лесни притисоци. На прашањето од новинарите да го коментираат барањето на пратенците на Алтернатива на Германија во Бундестагот, кои бараат од Берлин да го повлечат признанието на Косово, Вучиќ рече дека тоа не е реално, затоа што политиката ја води владата на Олаф Шолц, но за него важно е да има рационални ставови во Европа.
„Но, ние дефинитивно ќе се соочиме со лесни притисоци, но и по тоа прашање имаше безброј невистини и лаги претходните денови, затоа што многумина беа ужасно нервозни, лути, со надеж дека ќе потпишам нешто и се надеваа дека ќе можат да речат дека Србија изгубила, бидејќи тие никогаш не биле загрижени за Србија, туку се загрижени за нивните фотелји и дали можат да ги достигнат овие фотелји и полните каси за кои не се заслужни“, рече Вучиќ на новинарите во Доха.
Како што вели, најдобро му е кога ќе му кажат дека денес ситуацијата е различна и дека 27 земји го повлекоа признанието на Косово, а во нивно време, ниту една земја не го сторила тоа. „Сега ги слушате тие луѓе, кои ви солат памет и ви држат предавања, повикувајќи се на аргументите што ги создадовме, правевме и спроведовме на дело и се прашувате кој е луд овде, за тоа што се работи тука“, прокоментира Вучиќ.