Вашингтон не гледа причина да го промени распоредувањето на своите нуклеарни сили поради обновената нуклеарна доктрина на Русија, изјави портпаролот на Стејт департментот Метју Милер.
„Не гледаме причина да направиме промени во нашите нуклеарни сили, но ќе ја повикаме Русија да престане со својата милитантна и неодговорна реторика“, рече Милер на брифинг со новинарите.
Како што тврди тој, по почетокот на Специјалната воена операција, Русија „се обидува да ја принуди и заплаши Украина и другите земји ширум светот со неодговорна реторика во врска со нуклеарното оружје“.
„Ниту САД, ниту НАТО не претставуваат никаква закана за Русија“, тврди Милер.
Тој исто така изјавил дека САД продолжуваат да споделуваат разузнавачки информации со Украина со надеж дека ќе ја подобрат позицијата на украинската војска на бојното поле.
Милер одбил да прецизира дали американски воени експерти биле вклучени во лансирањето на тактички балистички ракети Атакамс од Украина кон Русија.
Портпаролот на Советот за национална безбедност на Белата куќа исто така изјави дека американската администрација не гледа причина за промена на американските нуклеарни сили, пренесува Ројтерс.
Во меѓувреме, зборуваше и заменик-портпаролката на Пентагон, Сабрина Синг, која на прашањето за промените во руската политика за нуклеарното оружје, рече дека САД не се во војна со Русија.
Таа исто така рече дека Пентагон не гледа причина да го промени распоредувањето на своите нуклеарни сили поради одлуката на Москва да ја обнови својата нуклеарна доктрина.
„Дозволете да објаснам: не сме во војна со Русија… Не гледаме знаци дека Русија се подготвува да употреби нуклеарно оружје во Украина“, кажала Синг.
Во исто време, таа додала дека Русија е наводно одговорна за ескалацијата на ситуацијата околу Украина.
Како што претходно соопшти Министерството за одбрана на Русија, вооружените сили на Украина веќе извршиле напад со шест балистички ракети „Атакамс“ врз областа Брјанск. Руските системи за противвоздушна одбрана соборија пет проектили, еден е оштетен. Во нападот нема жртви или материјална штета.
Во меѓувреме, украинскиот претседател Володимир Зеленски објави дека Украина добила дозвола од Западот да користи ракети со долг дострел за напади длабоко на руска територија.
Американскиот претседател Џозеф Бајден, Советот за национална безбедност на Белата куќа, Министерството за одбрана на САД и Стејт департментот одбиваат да одговорат на прашања и официјално да потврдат дали ѝ дале дозвола на Украина да изврши напади со американски ракети „Атакамс“ длабоко во внатрешноста на Русија.