Главната придобивка за земјоделството од „Отворен Балкан“ е што се усогласени лабораториските процедури меѓу Србија, Албанија и Северна Македонија и што повеќе нема чекање на границите поради фитосанитарна и ветеринарна контрола, изјави српскиот министер за земјоделство Бранислав Недимовиќ.
Во интервју за српска „Политика“, Недимовиќ вели дека резултатите во подобрувањето на трговската размена се веќе видливи и дека годинава извозот од Србија во Северна Македонија е зголемен за 15 отсто, а во Албанија за 19 отсто.
„Во случајот со Албанија, во првите десет месеци го надминавме целиот резултат од минатата година“, изјави Недимовиќ.
Тој додаде дека за разлика од претходниот период кога ветеринарната и фитосанитарната инспекција работеше 24 часа од едната страна на границата, а од другата не работеше, сега таа работа е уредена така што сите работат континуирано, седум дена во неделата.
Тој посочува дека за стопанствениците е важно да се усогласат лабораториските анализи.
Недимовиќ изјави дека тоа што е предизвикано во Скопје важи и во Белград и во Елбасан или каде било на друго место.
„Ова беше камен на сопнување во минатото, но веќе го нема. Сега одиме во царинската испостава, таму се поставуваат хартиите и стоката се продава таму каде што е потребна. Тоа е главното наследство на Отворениот Балкан за земјоделство“, подвлече тој.
Размената меѓу Србија и Албанија во земјоделскиот сектор изнесува 70 милиони евра, а со Северна Македонија 260 милиони, објавуваат српските медиуми.
Според податоците на Републичкиот завод за статистика, Србија во Северна Македонија најмногу извезува житарки и производи од житарки, зеленчук и овошје, млечни и други прехранбени производи и преработки.
Речиси половина од увозот од Северна Македонија се зеленчук и овошје.
Во случајот на Албанија, житарките исто така се на прво место во извозот, а потоа следат пијалоците, производите од зеленчук и овошје, млекото и млечните производи.
Годинава Србија најмногу купувала зеленчук и некои видови овошје од Албанија.