Бразилскиот репрезентативец Нејмар, кој се повреди во октомври 2023 година и беше опериран еден месец подоцна, откри дека неговото закрепнување е „болно“, но теле добро.
„Тоа е болно, имаше многу страдања, но јас сум на пат кон опоравување. Поминаа седум месеци од повредата, има уште малку, но ќе успеам“, прокоментира Бразилецот во Сао Паоло на аукциската продажба на предмети во корист на неговата фондација.
Нејмар беше опериран во ноември во Бразил поради скинати вкрстени лигаменти и скинат менискус на левото колено, а повредата ја заработи на мечот на Бразил со Уругвај од 17 октомври за светските квалификации.
32-годишниот Нејмар игра за Ал-Хилал во Саудиска Арабија каде заработува 100 милиони евра годишно, но има многу малку играно за тимот. Тој исто така ќе го пропушти почетокот на новата сезона и нема да биде достапен за Бразил на Копа Америка што ќе се одржи во САД меѓу 20 јуни и 14 јули.
„Тажно е, несреќен сум што гледам отстрана, но ќе навивам за тимот. Се надевам дека Бразил ќе победи, имаме многу квалитетни играчи“, додаде напаѓачот.
Тој исто така му честиташе на напаѓачот на Реал Мадрид, Винисиус Јуниор за освојувањето на Лигата на шампионите.
„Очигледно е дека Златната топка е за него, му ја посакувам. Му испратив порака пред финалето и потоа. Сигурно е дека ќе ја освои Златната топка, тој е неверојатен и гордо ги носи боите на нашата земја низ целиот свет“, додаде Нејмар.
Запрашан дали ќе се врати во бразилскиот Сантос, каде што ја започна својата кариера, тој одговори: „Тоа е целосно неточно, ништо не е планирано. Имам уште една година од договорот со Ал-Хилал и се надевам дека ќе имам голема сезона“, истакна Бразилецот.