Демонстрантите кои протестираа против прифаќањето на францускиот предлог за решение на спорот со Бугарија вечерва се судрија со полицијата пред Собранието на Северна Македонија.
Протестот започна пред зградата на Владата на Северна Македонија, пред која беше поставен полициски кордон во опрема за разбивање демонстрации, а заврши пред Собранието, каде десетици демонстранти, некои од нив маскирани, фрлаа петарди, факели, шишиња со вода и камења кон полицискиот кордон.
По отстранувањето на заштитната ограда и движењето кон кордонот, полицијата интервенираше и ги оттурна демонстрантите од зградата на Парламентот, обезбедувајќи ги околните улици.
Демонстрантите продолжија да фрлаат предмети кон полицијата, при што има неколку повредени полицајци, а неофицијално најмалку двајца демонстранти се приведени.
Учесниците на протестот, поддржани од најголемата македонска опозициска партија ВМРО ДПМНЕ, сметаат дека францускиот предлог е штетен за македонските национални интереси и води кон бугаризација на земјата.
На протестот можеше да се слушнат повици за оставка, навредливи зборови упатени до политичарите, до премиерот на Северна Македонија, претседателот на државата, министерот за надворешни работи.
Претходно, во протестна прошетка од Владата до Собранието, незадоволни граѓани поминаа пред зградата на МНР, по која гаѓаа со јајца, петарди и други предмети, каде побараа оставка од министерот Бујар Османи, кого тие веруваат дека лошо се справува со преговорите со Софија.
Демонстрантите носеа државни знамиња, како и знамиња со сонцето од Вергина, симболот на античка Македонија, а за време на протестот извикуваа „Оставка, оставка“, „Македонија, Македонија“, „Никогаш Северна, само Македонија“.
Претседателот на Европскиот совет, Шарл Мишел денеска престојуваше во Скопје за да ги охрабри македонските власти и граѓани да го прифатат францускиот предлог поддржан од целата ЕУ и за кој вели дека ќе овозможи отворање на првата фаза од пристапните преговори, што де факто ќе ја деблокира интеграцијата на Северна Македонија во ЕУ. Владата на Димитар Ковачевски и шефот на државата Стево Пендаровски му потврдиле на Мишел дека предлогот станал прифатлив по модификацијата, но дека конечниот збор треба да го даде парламентот.