Кинеската марка BYD оваа есен ќе започне со производство на електрични автомобили на Стариот континент.
Европското производство на моделот на азиската марка со нулта емисија ќе започне во октомври и ќе се одвива во фабрика во Унгарија, пренесе Automotive News Europe.
Во унгарската фабрика на BYD во Сегед, кинескиот производител на автомобили првично ќе ги произведува моделите Dolphin и Atto 3. Турската фабрика ќе започне со работа малку подоцна, во март 2026 година. Заедно, овие две фабрики ќе имаат производствен капацитет од 500.000 автомобили годишно.
BYD ќе произведува електрични автомобили во Европа за да избегне нови царини наметнати од Европската унија за сите електрични автомобили произведени во Кина. Во моментов, сите електрични модели произведени од BYD подлежат на дополнителни 17 отсто царина, покрај постојниот увозен данок од 10 отсто.
Оваа кинеска марка минатата година продаде повеќе од 50.000 нови електрифицирани возила на европскиот пазар. Тоа е три пати повеќе од претходната година. Со производството во Европа, оваа бројка ќе биде значително поголема, пренесе Klix.