Ако сè уште имаше простор за шпекулации за тоа каде Лионел Меси би можел да ја продолжи кариерата, тие сега значително ќе стивнат.
И покрај постојаните надежи на навивачите на Барселона дека нивниот легендарен капитен ќе се врати на реновираниот „Камп Ноу“, сè укажува дека Аргентинецот ќе остане во САД, бидејќи е на прагот да го продолжи договорот со Интер Мајами.
Според „Атлетик“, Лионел Меси, чиј актуелен договор истекува на крајот на оваа година, е во завршна фаза од преговорите со клупските челници за продолжување на соработката во 2025 година. Очигледно, неговата желба е да остане активен и по Светското првенство во 2026 година, што ќе се игра во САД, со натпревари исто така во Мексико и Канада.
Интер Мајами следната година планира да отвори нов стадион со капацитет од 25.000 гледачи, а сосема е јасно дека и управата и навивачите би сакале Меси да го отвори со настап. Дополнителна димензија внесуваат се погласните шепотења за можното доаѓање на Кевин Де Бруин, кој во текот на летото би можел да се пресели во потопла клима.
„Очекувам Лионел Меси да игра на новиот стадион на Интер Мајами во 2026 година. Ова е важна одлука и во моментов разговараме со него за неговата иднина во клубот“, изјави на оваа тема претседателот на Интер Мајами, Хорхе Мас.