Бранимир Несторовиќ, пратеникот избран на листата „Ние – гласот на народот“, денеска изјави дека никој не може да биде исфрлен од тоа движење, бидејќи тој е „овластено лице“, што може да се провери и во Агенцијата за економски регистри (АПР).
Несторовиќ во интервју за Телевизија Хепи изјави дека коосновачот на тоа движење Бранко Павловиќ не можел да го исфрли и дека дури и сметката на движењето била отворена на негово име, бидејќи тој бил носител на листата.
„Тоа значи дека нема да добијат пари“, рече Несторовиќ, мислејќи на парите што државата ги плаќа на партиите и движењата кои имаат претставници во парламентот.
Тој додаде дека конфликтите во рамките на движењето „Ние – гласот на народот“ постојат веќе некое време и дека се започнало кога човекот кој ги води книгите на тоа движење го известил дека еден од соосновачите, Драган Станојевиќ се обидел да земе пари од сметката без овластување.
Соработникот на Несторовиќ, Александар Павиќ изјави дека Станојевиќ го навредувал и му се заканувал поради таа информација и дека после тоа немало можност за соработка.
Павиќ го обвини Павловиќ дека во движењето го донел и Александар Јерковиќ, кој беше носител на листата за изборите во Белград, а проблемот настанал затоа што му ветил дека ќе добие пратеничко место, иако за ова немало договор.
Движењето „Ние – гласот на народот“ има 13 пратеници во републичкиот парламент, додека во белградското собрание има шест советници, што ги прави организација од која зависи мнозинството и формирањето на новата владејачка коалиција.