Премиерот на Израел, Бенјамин Нетанјаху синоќа го повикал актуелниот министер во воениот кабинет Бени Ганц да ја промени одлуката за оставка и да се врати во кабинетот.
Нетанјаху му рекол на Ганц преку платформата „Х“ дека „ова не е време да се откажеме, туку да ги здружиме силите“.
-Граѓани на Израел, ќе продолжиме до победата и да се постигнат сите цели на војната, што е најважно ослободување на сите наши заложници и елиминација на Хамас, навел Нетанјаху.
Нетанјаху нагласил дека останува отворен за соработка со која било политичка партија која ја поддржува војната против Хамас и која ќе му помогне на Израел да победи во војната и да ја обезбеди безбедноста на израелските граѓани.
Израелскиот министер за воен кабинет Бени Ганц синоќа објави дека поднесува оставка.
-На прес-конференција Ганц го повика премиерот Нетанјаху да одреди датум за избори и го повика „да не дозволи нацијата да се распадне“, пренесува Харец.
Ганц минатиот месец го извести Нетанјаху дека доколку до 8 јуни не претстави јасна стратегија за Појасот Газа по завршувањето на војната, ќе поднесе оставка.