Во руските клиники наскоро ќе бидат воведени сексолози за да им помогнат на пациентите да ја „надминат“ хомосексуалноста и различните сексуални „ментални нарушувања“, се вели во декретот на министерството за здравство, во последниот напад на Кремљ врз, како што се опишуваат, „нетрадиционалните начини на живот“.
Декретот, кој стапува на сила на први јули, доаѓа во време на задушување на правата на ЛГБТ луѓето, што рускиот претседател Владимир Путин се обиде да го прикаже како доказ за моралното распаѓање во западните земји, од кои, по неговото мислење, Русија мора да се заштити.
„Помошта од такви експерти е неопходна доколку некое лице сака да се опорави од фригидност, импотенција или слични прекршувања на сексуалното однесување како фетишизам, мазохизам и садизам“, се наведува во официјалниот весник на рускиот парламент.
Според декретот потпишан од Путин, специјалисти ќе им помагаат на пациентите кои имаат „нетипични тенденции како што се автоеротизам, хомосексуалност, содомија“, се додава.
Светската здравствена организација (СЗО) ја отстрани хомосексуалноста од листата на ментални нарушувања во 1990 година.
Русија го направи тоа во 1999 година.
Но, Путин минатиот декември потпиша закон со кој ги проширува ограничувањата на она што тој го нарекува „ЛГБТ пропаганда“, со кој се забранува секое јавно изразување на лезбејки, геј, бисексуалци или трансродови начини на живот во Русија.
Властите веќе го искористија овој и постарите закони за да ги затворат парадите на гордоста и да ги приведат активистите за правата на хомосексуалците.