Мајката на мажот обвинет за убиство на поранешниот јапонски премиер Шинзо Абе е припадничка на Унификациската црква, позната и како секта на Месечината, потврдија денеска од организацијата, за која обвинетиот изјавил дека сакал да ѝ се одмазди.
Тесуја Јамагами (41) сакал да се одмазди на една организација и решил да го убие Абе затоа што мислел дека поранешниот премиер има врска со неа, соопшти во петокот јапонската полиција.
Јапонските медиуми јавија за верската организација без да ја именуваат и потврдија дека осомничената Јамагами сакала да ѝ се одмазди бидејќи наводно добила големи подароци од неговата мајка, поради што нивното семејство се соочило со големи финансиски тешкотии.
„Мајката на осомничениот Тесуја Јамагами е член на нашата организација и учествува на црковни настани околу еднаш месечно“, изјави денеска на прес-конференција итно организирана во Токио, Томихиро Танака, претседател на јапонскиот огранок на Унификациската црква.
Тој не наведе какви подароци ѝ дала мајката на осомничениот на црквата, наведувајќи дека истрагата на полицијата е во тек и дека организацијата сака да соработува со полицијата.
Тој истакна дека неговата организација е згрозена од убиството на Абе, кој никогаш не бил нивни член или советник.
Жената се приклучила на црквата во 1998 година и организацијата дознала дека таа западнала во сериозни финансиски тешкотии околу 2002 година, рече Танака, додавајќи дека не ги знаат околностите кои довеле до банкрот на семејството.
Тој рече и дека подароците за црквата се даваат на доброволна основа.
Абе им подлегна на прострелните рани во петокот додека зборуваше на предизборен митинг во Нара, западна Јапонија.