Во понеделник наутро, новинарите од целиот свет имаа ретка прилика – средба со новиот Папа Лав XIV во модернистичката сала за аудиенции на папата Павле VI во Ватикан. Иако новинарите обично се водат од професионална воздржаност, овојпат атмосферата беше поинаква – исполнета со возбуда, емоции и аплауз.
Салата, со капацитет од 6.000 места, беше преполна до половина со новинари кои немирно го чекаа доаѓањето на Папата. Некои ги врзуваа знамињата на своите држави на безбедносните огради, додека други се обидуваа да го забележат моментот со своите мобилни телефони.
Сцената се смени кога папата се појави, придружен од швајцарската гарда во полна облека. Целата публика стана и го поздрави со долг и гласен аплауз. Папата им возврати со насмевка и ги повика сите да седнат.
„Добро утро и ви благодарам за овој прекрасен прием“, рече Папата Лав XIV, видно изненаден од топлиот дочек. Но, брзо ја насочи атмосферата кон сериозна порака – за важноста на вистината, правдата и слободата на медиумите.
„Слободата на говор и слободата на печатот се скапoцени подароци, особено во вакви турбулентни времиња“, порача тој. Потсетувајќи на зборовите на Свети Августин, тој рече: „Ние сме времето.“
Папата упати охрабрувачки зборови до новинарите, повикувајќи ги никогаш да не се задоволуваат со просечност. „Новинарството е предизвик, а не нешто од што треба да се бега“, додаде тој.
Неговата поддршка за новинари кои се наоѓаат во притвор или работат во опасни услови беше пречекана со одобрување. Но, најсилна реакција предизвика неговиот апел за вистинитост и одбивање на поделбите. „Мора да кажеме ’не‘ на војната – и со зборови и со слики. Да ја отфрлиме парадигмата на војна“, нагласи Папата.
Говорот заврши со кратка молитва и благослов за сите присутни, без да отвори можност за новинарски прашања. Потоа, Папата Лав XIV прошета низ салата поздравувајќи ги присутните, следен од десетици камери и восхитени погледи.