Бројот на новозаразени со коронавирус во Израел се искачи на највисоко ниво од крајот на март. Министерството за здравство денеска соопшти дека во последните 24 часа се регистрирани 730 нови случаи, јави ДПА.
Од 55.000 тестирани лица, 1,3 проценти биле позитивни. Има 45 сериозно болни пациенти, но не се пријавени нови смртни случаи.
Според официјалните податоци, повеќето нови инфекции се поврзани со делта-варијантата. Меѓу новозаразените има млади луѓе и оние кои веќе примиле две дози вакцина против КОВИД-19.
Израел сега предвидува лица со послаб имунитет да добиваат трета доза.
Од скоро 80 хоспитализирани пациенти со коронавирус, повеќе од половина се вакцинирани, покажуваат податоците на Министерството за здравство.
Истражувачот Еран Сегал од институтот Вајзман изјави дека зголемувањето на нови инфекции веројатно ќе го зголеми бројот на сериозни болести и смртни случаи.
„Сепак, процентот на заразени кои сериозно ќе се разболат или ќе умрат ќе биде значително помал и не очекуваме враќање на големиот број сериозно болни луѓе забележани за време на врвот на пандемијата“, рече тој.
Скоро 62 проценти од 9,3 милиони жители на Израел ја примиле првата доза на вакцина КОВИД-19, а скоро 56 проценти примиле две дози.