Националниот парк Шар Планина до Владата испрати официјално барање за раскинување на договорите за изградбата на две мали хидроелектрани.
Со цел да се спречат штетите од инфраструктурни проекти што може да имаат долгорочни последици врз природата во заштитените подрачја и Националниот парк Шар Планина, очекуваме дека Владата на Република Северна Македонија ќе изнајде решенија за раскинување на договорите за Пена 84 и Пена 85, а сите останати постапки за изградба на Мали хидро електрани во заштитените подрачја ќе бидат веднаш стопирани, побараа од НП Шар Планина.
Во барањето образложуваат дека фирмата која има намера да гради, има договор од 2017, кој веќе е вон сила, но и анекс – договор, со кој Министерството за животна средина и просторно планирање го продолжува рокот за концесионерски договори за користење на вода за производство на електрична енергија и употреба на мала хидроелектрична централа за Пена 84 и Пена 85 од 25.01.2023 до 25.11.2024 година. Националниот парк не бил известен за оваа одлука, како и за тоа фирмата да има привремен статус за повластен производител од 25.01.2023 до 25.11.2024 година за Пена 84 и Пена 85.
Во моментот во Националниот парк оперативни се 13 мали хидроелектрани, додека една е завршена, но сè уште не е оперативна.