УСМАН ДЕМБЕЛЕ би можел да потпише за Њукасл следната година без надомест, тврди „Гол“.
Четвртиот најскап фудбалер на сите времиња има договор со Барселона до крајот на сезоната, а неговите агенти и тој одложуваат во прифаќањето на продолжувањето на договорот. Барселона брза францускиот репрезентативец што поскоро да потпише нов договор за да не замине бесплатно следната година.
„Дембеле ги разгледува своите опции по заминувањето од Барселона, а Њукасл е главниот кандидат за неговиот потпис“, пишува „Гол“, а шпанските медиуми пренесуваат дека Дембеле би можел да добие петгодишен договор со Њукасл, клубот со најбогатиот сопственик во свет и годишна плата и бонус од 15 милиони евра доколку дојде како слободен агент. Наводно, преговорите веќе започнале.
Дембеле во Барселона пристигна во 2017 година за 135 милиони евра. Тој имаше големи проблеми со повредите на „Камп Ноу“ и досега собра 118 натпревари и постигна 30 голови. Се уште не игра оваа сезона поради нова повреда, а Барселона му се заканува дека доколку не потпише договор, вториот дел од сезоната ќе го помине на трибините.
Да потсетиме, Њукасл неодамна беше продаден на инвеститори од Саудиска Арабија. Инвестициската група, предводена од Саудискиот фонд за јавни инвестиции (ПИФ), стана сопственик на култниот клуб.
На чело на ПИФ е Мохамед бин Салман, саудиски принц и првиот човек зад кралот во Саудиска Арабија. Тој ја води владата на неговиот татко, кралот Салман бин Абдулазиз и де факто е најмоќниот човек во државата.
Њукасл со тоа стана клуб со најбогат сопственик во светот, но поради правилата на финансискиот фер-плеј не може преку ноќ да ги донесе најдобрите играчи. Во следниот преоден рок може да потроши околу 230 милиони евра за нови играчи, па Њукасл планира да го состави тимот од ѕвезди како Дембеле, за кои не треба да се плаќа отштета.
По осум кола Њукасл се уште не знае за победа во Премиер лигата.