Дебатата за тоа дали кафето или зелениот чај се подобри за здравјето трае со години, но истражувањата покажуваат дека сите пијалоци кои содржат кофеин имаат еден заеднички ефект – тие можат да помогнат во одржување на здрава телесна тежина. Една студија покажа дека луѓето со повисоко ниво на кофеин во крвта имаат помала телесна маса, помалку телесни масти и 19 отсто помал ризик од развој на дијабетес тип 2.
Истражувачите исто така откриле дека дури 43 отсто од ефектот на кофеинот врз намалувањето на ризикот од дијабетес е директно поврзан со неговата способност да ја намали телесната тежина.
„Кофеинот го стимулира адреналинот, кој може да помогне во разградување на мастите, намалување на апетитот и подобрување на физичката активност“, вели нутриционистката Кетлин Мур за „Parade“. Кога станува збор за тоа кој извор на кофеин има најголемо влијание врз намалувањето на ризикот од дијабетес тип 2, Мур истакнува дека кафето без адитиви како шеќер, павлака и вештачки засладувачи веројатно има најсилно дејство бидејќи содржи повеќе кофеин отколку, на пример, зелениот чај. „За жал, зелениот чај не влијае на атлетските перформанси како кафето“, истакнува Мур.
Експертите препорачуваат вкупниот дневен внес на кофеин да не надминува 400 милиграми.
Поголемите количини на кофеин може да ги зголемат позитивните ефекти врз губењето на тежината, но умереноста е сè уште клучна. „Спортистите можат да користат кофеин за да ја подобрат будноста и перформансите, додека прекумерните количини може да бидат проблематични за луѓето со хипертензија“, предупредува Мур.
Но, дури и помали количини на пијалоци со кофеин може да бидат корисни: „Во мојата пракса, гледам kako учесниците губат тежина со замена на зашеќерените пијалоци со кафе, чај или вода“. Исто така, прелиминарните истражувања сугерираат дека зелениот чај може да го зголеми нивото на лептин, хормонот на ситост и да го промовира разградувањето на висцералните масти.
Без разлика дали ќе избереме кафе или зелен чај, експертите препорачуваат вкупниот дневен внес на кофеин да не надминува 400 милиграми, бидејќи консумирањето поголеми количини може да доведе до несакани ефекти како срцеви проблеми, анксиозност и несоница.
„Овој привремен излив на енергија може да предизвика енергетски „пад“ кај некои луѓе откако ќе исчезнат ефектите од кофеинот“, заклучува Мур.