Објавена е уште една, четврта серија судски документи поврзани со американскиот финансиер и сексуален престапник Џефри Епстајн.
Документот на повеќе од 250 страници, објавен во понеделникот, покажува дека една од обвинетите, Сара Рансом, тврдела дека видела секс снимки снимени од Епстајн, но подоцна изјавила дека сака да ги отфрли обвиненијата против Епстајн, објави Би-Би-Си.
Според стотици страници документи, Рансом во мејловите кажала дека видела секс снимки во сопственост на Епстајн, на кои можеле да се видат и поранешниот американски претседател Бил Клинтон, британскиот принц Ендру и британскиот бизнисмен и инвеститор Ричард Бренсон.
Сепак, списанието New Yorker во 2019 година објави дека Рансом признала дека го измислила своето тврдење.
Во еден мејл без датум, кој бил внесен како доказ, Ренсом изјавила: „Кога мој пријател имаше секс со Клинтон, принцот Ендру и Ричард Бренсон, Џефри всушност ги снимаше секс сцените во секоја прилика“.
Таа, исто така, во мејл тврдела дека поранешниот американски претседател Доналд Трамп имал секс со нејзина пријателка во домот на Епстајн во Њујорк. Портпаролот на Трамп Стивен Чунг рече дека тврдењата на Рансом за поранешниот претседател се „неосновани“.
Ренсом тврдела дека била принудена да има секс со поранешниот адвокат на Епстајн, Алан Дершовиц, кој ги негираше обвинувањата и рече дека никогаш не ја запознал.
Таа добила спогодба во 2018 година, откако ги тужеше Епстајн и неговата поранешна девојка Гислејн Максвел за необјавен износ.
Ренсом навела дека Максвел ја регрутирала во својот синџир за сексуална трговија во 2006 година, кога таа имала 22 години.
Таа беше сведок во случајот против Епстајн и Максвел и обезбеди докази за вмешаноста на Максвел, наведе Би-Би-Си.
Тоа е четврто објавување на записи поврзани со случајот на жртвата Вирџинија Џуфре против поранешната девојка на Епстајн, Гислејн Максвел.
Тужбата, поднесена во 2015 година, беше решена во 2017 година, а Максвел потоа беше осуден на 20 години затвор за помагање на Епстајн да злоставува млади девојки. Таа поднела жалба на таа пресуда.
Минатата недела беа објавени три серии долго запечатени судски документи против Епстајн, кои содржеа досега непознати детали.
Епстајн се изјасни за виновен за принудување малолетници на проституција во 2008 година. Тој си го одзеде животот во 2019 година додека го чекаше судењето по обвиненијата за трговија со луѓе.