Подморскиот експерт Пол Ханкен на прес-конференција на крајбрежната стража рече дека спасувачите пронашле „пет различни големи парчиња остатоци што ни кажува дека се од Титан“.
„Првото нешто што го најдовме беше конусот на носот… потоа најдовме големо поле со остатоци. Во рамките на тоа големо поле го најдовме предното ѕвоно на трупот. Тоа беше првиот показател дека се случил катастрофален настан. Набргу потоа најдовме уште едно помало поле со остатоци. Го најдовме другиот крај на трупот кој… во основа се состои од целата комора… Ќе се потрудиме целосно да го мапираме она што е таму долу“, рече Ханкен.
„Сега веруваме дека животите на нашиот извршен директор Стоктон Раш, Шахзада Давуд и неговиот син Сулејман Давуд, Хамиш Хардинг и Пол-Анри Наргеолет се за жал изгубени. Овие луѓе беа вистински истражувачи кои споделуваа посебен дух на авантура и длабока страст за истражување и заштита на светските океани. Нашите срца се со овие пет души и секој член од нивните семејства во ова трагично време. Жалиме за загубата на нивните животи и радоста што им ја донесоа на сите што ги познаваа. Ова е крајно тажно време за нашите посветени вработени кои се исцрпени и длабоко тагуваат за оваа загуба. Целото семејство на OceanGate е длабоко благодарно на безбројните мажи и жени од повеќе организации во меѓународната заедница кои ја забрзаа достапноста на широк спектар на ресурси и работеа толку напорно на оваа мисија. Ги цениме нивните посветеност на пронаоѓањето на овие пет истражувачи и нивните неуморни денови и ноќи за поддршка на нашиот екипаж и на нивните семејства. Со почит бараме да се почитува приватноста на овие семејства во овој најболен момент“, се вели во соопштението на компанијата OceanGate што го пренесе Би-Би-Си.