Барселона би можела да се најде во ќорсокак со своите нови засилувања доколку не најде начин да ја намали платата на играчот од средниот ред Френки де Јонг, тврди каталонскиот новинар Алфредо Мартинез.
Холанѓанецот беше донесен на „Камп Ноу“ во 2019 година од Ајакс во зделка вредна 86 милиони евра, што му донесе една од најголемите плати во клубот. Меѓутоа, една година подоцна, Каталонците се најдоа во исклучително тешка финансиска ситуација, а поради пандемијата Ковид-19, од играчите беше побарано да ги намалат платите со ветување дека заштедите ќе им бидат исплатени до крајот на нивните договори, што во случајот на играчот од средниот ред е до летото 2026 година.
Според неофицијални податоци, Барселона му должи на Де Јонг околу 17 милиони евра и играчот разбирливо не сака да си замине, со што би се откажал од сумата што му доспева, што е нешто повеќе од неговата годишна плата од 16 милиони евра.
Доколку ова прашање не се реши, правилата на Ла Лига нема да им дозволат на Каталонците да ги регистрираат своите нови играчи, вклучувајќи ги Роберт Левандовски и бразилскиот плејмејкер Рафиња.
Најдобра опција за раководството на Барселона е Де Јонг да биде продаден, но Холанѓанецот веќе неколку пати изјави дека нема интерес за заминување. Каталонците постигнаа договор за трансфер со Манчестер Јунајтед, но 25-годишниот играч од средниот ред допрва треба да се разбере за неговите лични услови.
Според Мартинез, се разговарало и за опција за намалување на платата на играчот за 50 отсто, што исто така изгледа малку веројатно дека ќе се случи.