Овластен градежен инспектор од Општина Ѓорче Петров извршил вонреден инспекциски надзор и увид на местото каде ѕид меѓу вториот и третиот кат на станбен блок бил пробиен за време на изградба на нова висококатница.
-Констатирани се неправилности, изготвен е Записник од извршен инспекциски надзор и донесено е Решение со кое на инвеститорите им се наредува веднаш да ја прекинат натамошната изградба на објектот од втора категорија со намена А2 – колективна станбена зграда на улица „Партизански Одреди“ бр.бб, во рок од 5 дена да го вратат во првобидна состојба фасадниот ѕид на соседниот објект и веднаш да ја обезбедат сигурноста на околната градба, информираат од Општина Ѓорче Петров.
Бидејќи се работи за штета со можен основ за надомест, од Општината додаваат дека жителите имаат право да побараат и дополнителна правна заштита преку надлежните судови.
Се огласија од дел од партиите. Од Левица велат дека инцидентот е уште една директна потврда за урбанистичкото безумие и институционалната немост што секојдневно го загрозува животот на граѓаните.
-Неспособниот и сервилен општински градежен инспекторат, кој упорно одбива да постапува и по службена должност и по барања на жителите, е директен соучесник во овие напади врз урбаното ткиво на Ѓорче. Молчеливиот надзор и игнорирањето на очигледни прекршувања ги охрабруваат изведувачите да работат без имотно-правна чистота, без минимални стандарди за безбедност – како на работниците, така и на жителите. И не е прв пат да се загрози безбедноста на граѓаните на оваа локација! Потсетуваме дека за оваа градба веќе еднаш Левица алармираше за оставена длабока и незаштитена дупка на тротоарот, која беше санирана дури по наша јавна реакција и притисок, а беше сериозно ризична по животот на минувачите, порачаа од Левица.