Општина Карпош соопшти дека постојат две причини поради кои не биле поддржани предлозите за ревизија на два ДУП-а.
-Прво иницијатива за ревизија на ДУП-ови со која се суспендираат имотни права, а воедно и се кршат граѓански права, не може да се поднесе ад хок на самата седница на Совет. За оваа иницијатива е потребно сериозно образложение со однапред подготвен материјал кој треба да биде доставен најмалку седум дена однапред до советниците.
Второ, иницијативата е одбиена од формално правен аспект затоа што изгласаниот ДУП е со сила на Закон. Закон може да суспендира или да укине единствено Уставен суд и никој друг во државата. Советник нема ингеренции да суспендира закони затоа што со суспензијата на законите се предизвикуваат сериозни правни последници кои прават штета на граѓаните и општината. Доколку советниците на Левица однапред се консултирале со стручните служби ќе биле подготвени стручно, велат од општината и додаваат дека немаат намера да запираат или опструираат било каква иницијатива на советниците доколку се базира на правна основа.
Од Левица претходно соопштија дека ГРОМ и СДСМ се „здружиле“ во Карпош, поради тоа што Советот гласал против точките за ревизија на ДУП-овите.
-Интересен момент беше и синхронизираното гласање на советниците на ГРОМ и СДСМ што е малку зачудувачки откако во повеќе наврати претходно Стевчо Јакимовски ја нарекувше оваа партија предавничка. Со ова, уште еднаш се докажува дека советниците на другите политички партии немаат капацитет и намера да работат во интерес на жителите на Карпош. Советниците на Левица и натаму продолжуваат да ги користат сите можни механизми со цел исполнување на предизборната програма и ветувањата дадени изминатиот период, истакнуваат од партијата.