Општина Центар информира дека и вчера и денес инспекторите од Секторот за инспекциски работи на општината го завршија увидот во парк шумата Водно, каде е започнато изградба на нова населба.
-Се работи за 4 парцели во приватна сопственост, кои се надвор и од Деталниот урбанистички план и од Генералниот урбанистички план и се водат како земјоделско земјиште, односно лозја. На овие локации не е предвидена никаква градба ниту пак населба. На сопственикот ќе му биде врачено решение итно да го врати земјиштето во првобитна состојба и ќе биде изречена казна. Сопственикот исто така е пријавен во МВР, кое ќе го повика на разговор. Доколку се утврди прекршување на законските одредби, ќе добијат соодветни кривични пријави. Граѓаните да бидат спокојни, на тоа место нема ништо да се гради.За сите понатамошни постапки, јавноста ќе биде информирана дополнително, велат од Општина Центар.