Унгарија ќе го блокира влезот на Бугарија во Шенген зоната се додека е во сила данокот за транзит на руски гас, соопшти во саботата унгарското Министерство за надворешни работи.
Унгарија јасно и стави до знаење на Бугарија дека ќе стави вето на влезот на земјата во зоната на слободно движење доколку остане во сила данокот на главната рута за увоз на гас во Унгарија, се вели во соопштението на Министерството, цитирајќи го унгарскиот министер за надворешни работи Петер Сијартo
„Јасно им ставивме до знаење на Бугарите дека ако нивната одлука опстојува, односно ако долго време ја загрозуваат безбедноста на снабдувањето со енергија на Унгарија, ќе ставиме вето на нивниот влез во Шенген“, рече Сијарто.
Западноевропските земји вложија големи напори да се осамостојат од рускиот гас, а Унгарија, земја без море, годишно купува 4,5 милијарди кубни метри гас од Русија, главно преку Бугарија и Србија, според договорот потпишан во 2021 година.
Бугарија и Романија, кои се приклучија на ЕУ во 2007 година, сепак не успеаја да се приклучат на Шенген зоната и покрај нивните напори.
Потсетуваме, унгарскиот премиер Виктор Орбан во петокот остана на својата одлука да стави вето на пакетот помош на ЕУ за Украина во вредност од 50 милијарди евра и рече дека се уште може да го запре пристапот на Киев во блокот откако преговорите за членство добија зелено светло од земјите-членки.
На самитот во Брисел во четвртокот, другите лидери на Европската унија ги отфрлија приговорите на Орбан, по што тој ја напушти просторијата, бидејќи тие го презедоа историскиот чекор да се согласат да започнат пристапни преговори со земјата разурната од војна.
Сепак, тие не можеа да го надминат отпорот од Орбан – кој одржува блиски врски со Русија – за реконструкција на буџетот на блокот за канализирање на витална финансиска поддршка за Украина и обезбедување повеќе пари за други приоритети на ЕУ, како што е управувањето со миграцијата.