Фирмата Коноба Голд ДООЕЛ Скопје должи речиси 300 илјади евра кон Еуростандард банка и нема платено ниту една рата 738 дена односно цели две години. За фирмата се води обична меница како единствено обезбедување. Васка Василева е сопственик и управител на оваа фирма, депонент на Комерцијална банка. Фирмата ја основала во јуни 2015 година, со непаричен влог од 5 илјади евра и со седиште во општина Карпош во Скопје. И покрај долгот кон Еуростандард банка, Васка Василева ја затворила фирмата со тоа што Централен регистар ја избришал истата на 27 февруари 2020 година, на основа на неподнесена годишна сметка за 2017 година согласно член 552-а и 552-б од Законот за трговските друштва. Истиот принцип се повторува со многу фирми должници кои ја ограбија Еуростандард банка во сојузништво со високото раководство на Еуростандард банка и високо поставената државна Народна банка, соопштуваат од Здружението на Оштетени штедачи на Еуростандард банка.
„Издадена обична меница за кредит на фирма која изгледа се основала за да се украдат парите на депонентите во Еуростандард банка, да не се враќа долгот и да се затвори фирмата на основа на неподнесување на годишни сметки. Државата молчи, надлежните институции молчат. Основното јавно обвинителство за гонење на организиран криминал и корупција исто така молчи. За да се спроведе стратегијата за масовно уништување на човечките животи на 3.000 семејства во државата.
На фирмите доверители кои државата ниту ги заштитила со закон за обештетување, а законски ги условува да работат исклучиво и само преку банки и да плаќаат даноци за да може да работи тој државен апарат. Со наши пари да бидеме оштетени од оние кои ги плаќаме секој месец за да не заштитат. Од Народна банка, Финансовата полиција, Управата за финансиско разузнавање, Основното јавно обвинителство за гонење на организиран криминал и корупција и други комисии и тела кои постојат да го спречат ова зло кое не стави на врвно место во светот според корупцијата која беснее во државата“, се вели меѓудругото во соопштението.