Министрите за надворешни работи на Бугарија и Северна Македонија го потпишаа билатералниот протокол на чл. 12 од Договорот за добрососедство и пријателство.
Документот ќе биде дел од преговарачката рамка на Скопје за членство во ЕУ и содржи мерки за наставните програми за историја, говор на омраза и култура.
Министерката за надворешни работи Теодора Генчовска по потпишувањето истакна дека на состанокот на меѓувладината комисија утринава е забележан напредок во сите пет секторски групи.
„Бугарија е земјата која најсилно ја поддржува европската интеграција на Република Северна Македонија и Албанија. Оттука па натаму им посакуваме успех на патот по кој долго време сакаа да тргнат. Се надевам дека со заеднички напори и наша поддршка, тие ќе стигнат таму каде што граѓаните на РСМ најмногу сакаат да стигнат, а тоа е членството во ЕУ“, рече Генчовска.
Министерот за надворешни работи на Северна Македонија, Бујар Османи, истакна дека од денеска односите меѓу двете земји одат на ново ниво.
„За нас е историска можност што по 17 години кандидатски статус, Република Северна Македонија од утре може да ги започне преговорите со ЕУ и да ја започне последната фаза од нашиот пристап во ЕУ. Очекуваме поддршка од Бугарија, бидејќи ова е во наш интерес, освен на граѓаните на Северна Македонија, Бугарија е заинтересирана и за приклучување на Западен Балкан кон ЕУ“, додаде Османи.