Претседателката на Косово, Вјоса Османи, тврди дека најдобро би било статутот на Заедницата на српски општини (ЗСО) да го напише Приштина со САД и нацртот да биде претставен како нацрт на Косово.
Османи за приштинската РТВ21 изјави дека ЗСО мора да биде во согласност со уставот на Косово, дека мора да го почитува, како што наведе, „територијалниот интегритет и суверенитет“ на Косово, додавајќи дека мора да го почитува и, како што наведе, писмениот документ за американската позиција, како и писмото на поранешната висока претставничка за надворешна и безбедносна политика на ЕУ, Федерика Могерини, во кое, како што тврди, стои изјави дека ЗСО нема да има извршни овластувања.
Оваа изјава на Османи доаѓа откако портпаролката на ЕУ, Набила Масрали му рече на премиерот Албин Курти дека може да напише модерен европски нацрт на статутот на ЗСО, дека Приштина имала можност во последните 10 години да претстави предлог за ЗСО.
Масрали додаде дека во оваа напредна фаза од процесот, во која се очекува наскоро да започне формирањето на ЗСО, Приштина е поканета да ги понуди своите коментари и предлози за нацртот што е на маса.
Истовремено, Европската унија оцени дека предлог-статутот на Заедницата на општините со српско мнозинство, што нејзините претставници го претставија на 21 октомври, е најдобар можен и додаде дека очекува двете страни да продолжат со разговорите врз основа на тој нацрт.
Формирањето на ЗСО е предвидено со бриселскиот договор од 2013 година, но Приштина одбива да ја спроведе оваа обврска.