Причина за неуспехот на уставните измени се претстојните избори, изјави министерот за надворешни работи Бујар Османи, кој воедно е и кандидат на ДУИ за претседател на државата. Во емисијата „Само интервју“, Османи ја повторил својата поента дека со гласањето во бугарскиот парламент за преговарачката рамка со Македонија, акцентот на билатералните прашања се префрлил од историјата на човековите права. Според него, тоа се случило со „голема помош од САД“. Истакна дека тежината на позицијата на Македонија е намалена поради фактот што Парламентот не ги прифати измените во Уставот, со кои Бугарите би биле вклучени во основниот закон.
„Убеден сум дека го најдовме најдоброто решение во преговарачката рамка, што е во наш интерес бидејќи фокусот го става на правата на малцинствата, а не на историјата“, посочи Османи.
Запрашан за реакцијата на бугарското Министерство за надворешни работи, кое во средата ја повика македонската амбасадорка на средба во Софија „по повод неодамнешните јавни коментари на политичари од соседната земја и лажни изјави од нивна страна во однос на Бугарија“, Османи изјави дека Агнеса Руси Поповска била повикана „поради член од Договорот потпишан во 1999 година меѓу владата на ВМРО-ДПМНЕ, на тогашниот премиер Љубчо Георгиевски, со тогашниот бугарски премиер Иван Костов“.
„Во 1999 година, Владата на ВМРО-ДПМНЕ има потпишано изјава со премиерот на Бугарија, Костов и во еден член во изјавата стои дека Северна Македонија нема да се меша во внатрешните прашања на Бугарија по однос на малцинските права. Не ја бранам позицијата на Бугарија, ви кажувам што и кажале на амбасадорката по однос на тоа прашање. Тие се повикуваат на изјавата од 99-та година“, кажа Османи.
Според него, на претседателските избори на 24 април ќе има „голем број граѓани“ кои ќе гласаат за него, бидејќи, како што вели, „токму тој го започнал стратешкиот дијалог со САД, бил претседавач со ОБСЕ, за прв пат во земјава пристигнал државен секретар на САД и тој бил првиот што го официјализирал јазикот во преговарачката рамка и успеал да го префрли фокусот на прашањата за малцинствата, при што започнале преговорите со ЕУ“.
„Доволно сум препознатлив на меѓународно ниво дека фокусот е на мојата личност, а не на мојата етничка припадност. Работам да влезам во вториот круг од претседателските избори и јас сум единствениот кој ја разбира ЕУ, ја разбира идејата за консензус меѓу политичките партии и има јасен став за Русија. Русија е најјасната опасност за Балканот и ние мора да го зголемиме отпорот кон руското влијание“, рече Османи, според кого партиите кои свесно или несвесно ја попречуваат европската интеграција на земјата, работат за руските интереси на Балканот.