Косовскиот претседател Вјоса Османи во четвртокот ја повика Шпанија, една од петте земји од Европската унија кои не го признаа Косово, да им се придружи на другите земји во поддршката на мерките за казнување на Србија по смртоносниот инцидент меѓу косовските полициски сили и вооружените Срби минатиот месец на северот на Косово.
Османи разговараше со новинарите на почетокот на самитот на Европската политичка заедница во Гранада.
„Се надевам дека Шпанија ќе им се придружи на другите истомисленици во усвојувањето мерки против Србија за тој ужасен чин што го направи против мирот, стабилноста и безбедноста“, рече таа, според Хина, повикувајќи се на Ројтерс.
На прашањето дали може да има средба меѓу неа и српскиот претседател Александар Вучиќ во Гранада, таа одговори дека „нема причина да се сретнеме пред да бидат усвоени санкциите против Србија“.
„Прво, санкции, а за останатото можеме да зборуваме. Мора да разбереме дека од 24 септември не може да има нормална работа. Србија го изврши овој чин преку терористички и паравоени групи и со загрозување на Косово го загрози целиот европски континент“, рече Османи и додаде дека треба заедно да го спречиме агресорот да шири војна на Западен Балкан.
На 24 септември во Косово се случи вооружен конфликт во кој загинаа еден косовски полицаец и тројца српски напаѓачи.
Србија ги негира тврдењата на Косово дека ги поддржувала напаѓачите.
Белград го приведе, а потоа го ослободи српскиот политичар и бизнисмен од Косово, Милан Радоичиќ, кој призна дека тој го организирал нападот.
Косово и западните земји, исто така, ја обвинија Србија за зголемување на своето воено присуство во копнената безбедносна зона, појас од пет километри во Србија долж границата со Косово, што Белград го негира.
„Се надевам дека ќе имаме можност да разговараме со европските лидери за тоа како да усвоиме строги мерки и санкции против Србија, за да не ги охрабриме повторно да извршат ваков чин на агресија. Ќе бараме поддршка од европските лидери за обезбедување на границата меѓу Косово и Србија, бидејќи тоа е од суштинско значење за зачувување на мирот и стабилноста во целиот регион на Западен Балкан“, рече Османи, пренесе Анадолија.