Шефот на македонската дипломатија Бујар Османи се јави со реакција откако дел од медиумите блиски до опозицијата објавија детали од Протоколот меѓу Република Северна Македонија и Република Бугарија. Според министерот, тоа се неточни информации за содржината на текстот.
-Во јавноста е пласиран текст на бугарски јазик, кој претставува стара и неконечна верзија, како дел од од бројните сет идеи кои во минатиот период се разменуваа меѓу двете министерства за надворешни работи, напиша Османи на Фејсбук.
Министерот појасни дека пласирањето на овие неточни информации претставува тенденциозен обид да се наруши процесот на широки консултации за Францускиот предлог за отстранување на ветото и продолжување на Европските интеграции на земјава, кој во моментов е во финална фаза во Собранието на Република Северна Македонија.
-Во овој контекст би сакале да посочиме дека содржината на евентуалниот Протокол меѓу двете земји, како записник од идната седница на Заедничката меѓувладина комисија, финално ќе биде усогласен на самата седница на оваа Комисија, стои во објавата на Османи.