Британската полиција продолжува да го испрашува 32-годишниот маж осомничен за извршување на масовен напад со нож во воз во саботата навечер. Единаесет лица беа повредени, од кои едно е во критична состојба.
Полицијата не го третира инцидентот како поврзан со тероризам, но денес се очекува силно полициско присуство на главните железнички станици.
Мотивите за нападот остануваат нејасни. Повеќе детали веројатно ќе се појават подоцна денес во Долниот дом, каде што министерката за внатрешни работи Шабана Махмуд ќе ги информира пратениците за инцидентот.
Единаесет лица беа однесени во болница по крвопролевањето. Петмина се отпуштени. Еден останува во критична состојба. Станува збор за член на железничката компанија на линијата кој се обиде да го запре напаѓачот, спасувајќи ги животите на многу други.
Досега, полицијата го именуваше само машиновозачот, Ендру Џонсон, кој успеа да го запре возот на станицата Хантингдон за да може полицијата да интервенира. Познато е само дека 32-годишниот напаѓач е црн британски државјанин. Ослободен е уште еден 35-годишен британски државјанин со карипско потекло, кој претходно беше приведен.
Станицата Хантингдон останува затворена, но возовите сè уште сообраќаат, пренесе БНР.