Американската влада остана без пари за да и помогне на Украина, па Вашингтон повеќе не може да го снабдува Киев со проектили и муниција со истото темпо како пред една година, изјави американскиот секретар за одбрана Лојд Остин.
„Затоа ја повикувам оваа група да „копа длабоко“ за да обезбеди спасувачки копнени системи за воздушна одбрана и пресретнувачи на Украина“, рече Остин во видео обраќањето, повикувајќи ја Контакт групата за одбрана на Украина да ги покрие потребите на Киев додека конгресмените во Вашингтон не ги одобрат соодветните законски иницијативи, пренесува Укринформ.
Помошник-министерот за одбрана за меѓународни прашања, Селест Валандер, изјави дека украинското Министерство за одбрана добива извештаи од првите редови дека „единиците ги немаат потребните резерви на оружје и муниција“.