Во процесот на решавање на брачни проблеми и брачни кризи, начинот на кој некој комуницира може да открие многу за моменталната ситуација. Како што објаснуваат експертите, одредени фрази се карактеристични за жени кои се несреќни во брак.
Според нив, тие фрази не се нужно причина за проблемите, туку последица на долготрајно емоционално повлекување и чувство на немоќ. Брачната советничка Џенифер Харгрејв истакнува дека несреќните сопруги често ги започнуваат своите реченици со: „Кога само ти би…“. Како што објаснува, станува збор за начин на размислување каде што жената своето чувство на среќа го условува со однесувањето на партнерот или дури на децата. Наместо да ја препознае сопствената моќ за промена, таа верува дека решенијата се надвор од нејзина контрола.
„Таквите жени живеат со чувство дека се заробени, иако имаат сила да го променат својот живот“, вели Харгрејв.
Проблемот, според неа, е што промената често изгледа застрашувачки, па многу жени остануваат во состојба на незадоволство бидејќи тоа е болна, но позната територија.
Исто така, реченицата „Во право си, не треба вака да се чувствувам“ на прв поглед изгледа како прифаќање на туѓа перспектива, но всушност открива емоционално повлекување од односот. Терапевтката д-р Глорија Брејм предупредува дека ваквата изјава покажува дека жената престанала да верува дека нејзините потреби ќе бидат сфатени. Наместо да продолжи да се бори за она што ѝ е важно, таа ги премолчува емоциите и во себе развива план за излез од врската.
„Таквата жена научила дека искреноста води кон негирање, манипулација или обвинување“, вели Брејм.
Мажите често ја толкуваат оваа фраза како согласност со нивното мислење, не сфаќајќи дека нивната партнерка веќе размислува за развод. Дополнително, реченицата „Колку пати треба да ти повторам?“ открива длабока фрустрација и емоционален замор поради неисполнети потреби или постојано игнорирани молби. Кога се изговара, таа укажува на чувство дека другата личност не ве слуша и дека во врската постои хронично недоразбирање.
„Тоа произлегува од лоша комуникација и неспособност да се разберат емоционалните изрази на партнерот. За напредок во комуникацијата неопходно е преземање лична одговорност – нешто што на многумина им недостасува“, велат стручњаците.
Покрај тоа, кога врската ќе ја изгуби јасноста и заедничката цел, жените кои се чувствуваат несреќно често се враќаат на минатото. Потсетувањето на убавите моменти станува начин на емоционално преживување.
„Жената се држи до спомените за да го оправда останувањето во врската. Ако нема планови, заеднички цели или интимни моменти на кои се радува, жената почнува да се чувствува како минатото да е единственото нешто што ѝ преостанува. Ако партнерот не го препознае значењето на таквите реченици, лесно може да пропушти важни индикатори за тага и разочарување“, истакнува експертот.