За повеќето луѓе, пасивниот приход е дополнителен мал приход што е корисен за пополнување на домашниот буџет. За Стив Балмер тоа значи дека ќе заработува милијарда долари годишно без да прави ништо.
Балмер ќе собере толку дивиденди од Мајкрософт во 2024 година. Технолошкиот гигант ја зголеми својата квартална исплата на дивиденда на 75 центи по акција, или 3 долари по акција годишно.
Бидејќи Балмер, како поранешен извршен директор на Мајкрософт, поседува 333,2 милиони акции на компанијата од 2014 година, што е еквивалент на удел од четири отсто, тој ќе добие „ситниш“ од 1 милијарда долари во фискалната 2024 година. И тоа е само затоа што поседува акциите — без оглед на цената на движење на берзата.
Секако, можно е бордот на директори на Мајкрософт да одлучи да ја намали дивидендата, но тоа не изгледа веројатно. Откако компанијата почна да плаќа дивиденди на акционерите во 2003 година, износот само се зголемува.
Балмер не е единствениот кој заработува само од поседување акции на компании кои плаќаат дивиденди.
Беркшир Хатавеј на Ворен Бафет треба да инкасира дури шест милијарди долари дивиденда оваа година, се наведува во анализата на Волстрит журнал. Тоа е затоа што повеќето од компаниите во кои Беркшир Хатавеј инвестира исплаќаат дивиденди. Таа листа ги вклучува Шеврон, Банката на Америка, Епл, Кока-Кола, Крафт Хајнц и Американ Експрес.
На листата на милијардери на Форбс, Ворен Бафет моментално ја држи петтата позиција со проценето богатство од 106 милијарди долари, додека Стив Балмер е десетти со 80,7 милијарди долари.
Индексот на милијардери на Блумберг го става Балмер на петтата позиција со богатство од 115 милијарди долари.
Балмер му се придружил на Мајкрософт во 1980 година како асистент на Бил Гејтс, но всушност работел како генерален менаџер. Тој првично се согласил на основна плата од 50.000 долари плус 10 отсто удел од растот на профитот што го генерирал, но кога неговиот дел од профитот станал преголем, тој се согласил да ги замени условите за значителен сопственички удел во компанијата.
Доверлив советник на Гејтс, тој постепено стана извршен директор на Мајкрософт во 2000 година. Тој ја напушти функцијата во 2014 година.