Првообвинетиот за убиствата на Вања Ѓорчевска и Панче Жежоски, Љупчо Палевски-Палчо денеска изјави дека тој бил осуден уште на прес-конференцијата што ја одржаа тогашниот прв човек на полицијата, Оливер Спасовски и јавниот обвинител Гаврил Бубевски во 2023 година, кога се уште не беа познати деталите за убиствата.
-Судијата крие оружје бидејќи не се вклопува во претходно нарачаната пресуда на прес конференција од Гаврил Бубевски и Оливер Спасовски. Доживотната робија не ме плаши ниту влијae на мене. Има докази кои судијата не сака да ги види, ниту допушта да ги презентирам. Не знам како судијата ќе ги цени доказите кога не ги прочитал, рече Палевски во судниата на денешното рочиште.
Претходно Палевски кажа дека се бара изземање на судијата поради пристрасност.
Одбраната на Љупчо Палевски денеска не успеа да го изведе доказот од камерите на „Безбеден град“ што го најави на изминатото рочиште, а со кој сакаше да докаже дека Палевски ноќта 21 кон 22 ноември 2023 година бил во Скопје. Судот прифати да се прикаже снимката, но таа не беше презентирана. Адвокатите на Палевски побараа Јавното обвинителство да овозможи презентирање на видеозаписот, бидејќи не можеле да го отворат доказот.
На претходното, судијата донесе одлука да се направи увид во доказите кои ги поднел Палевски. За наредните рочишта е предвиден распит на обвинетите.
За двојното убиство се обвинети 5-мина, 4-ца како директни извршители и таткото на Вања за помагање.