Папата Франциск денеска предупреди на нефлексибилните идеолошки позиции кои би можеле да ја спречат Црквата да ја види реалноста и да продолжи напред, говорејќи неколку дена откако конзервативците ја осудија декларацијата со која се дозволува благослов на истополови двојки.
Папата, кој во неделата наполни 87 години, ги даде своите коментари во традиционалната божиќна честитка до членовите на куријата, централната администрација на Ватикан.
Во првите години од неговото папство, Франциск ги користеше божиќните честитки како повод за остри критики на бирократијата, посочувајќи ги, како што ги нарече, нејзините „болести“ во тоа време.
Во четвртокот, тој ја спомена континуираната дебата меѓу прогресивците и конзервативците, 60 години по Вториот ватикански собор, кој ја воведе Црквата во современиот свет.
Да останеме будни против крутите идеолошки позиции кои често под превезот на добри намери нè одвојуваат од реалноста и нè спречуваат да одиме напред, рече тој.
„Наместо тоа, повикани сме да тргнеме и да патуваме, како мудреците, следејќи ја светлината која секогаш сака да не води понатаму, понекогаш по неистражени патеки и нови патишта“, рече тој.
Во понеделникот тој ја одобри одлуката свештениците да можат да им даваат благослов на истополовите двојки под одредени услови и се додека тие не наликуваат на брак и не се дел од црковните ритуали или литургии.
Тој ѝ рече на толпата денеска дека христијаните секогаш треба да бидат отворени за промени.
„Христијанската вера – да се потсетиме – нема за цел да го потврди нашето чувство на сигурност, да ни овозможи да се сместиме во удобни религиозни верувања и да ни понуди брзи одговори на сложените животни проблеми“, рече тој.
Папата порача дека кога Бог нè повикува, тој „нè испраќа на патување, нè изнесува од нашите комфорни зони, од нашето самозадоволство со она што е веќе направено и на тој начин нè ослободува“.