Проактивната политика на француското претседателство со ЕУ е добредојдена и може да помогне да се најде решение за да и се помогне на земјата побрзо да ги започне преговорите за пристап во ЕУ, соопштиле од кабинетот на претседателот на РС Македонија Стево Пендаровски во врска со информацијата за евентуалниот нов предлог на Франција за решавање на спорот меѓу Софија и Скопје.
„Република Франција, како актуелен претседател на ЕУ, најави зголемена посветеност за изнаоѓање решенија за отворените прашања на Западен Балкан. Затоа, активноста на француската дипломатија во последните шест месеци, т.е. состаноците на политичко и експертско ниво не се нов обид за пробив, туку се целосно усогласени со декларираните приоритети за Европското претседателство. Целта на сите активности е да се направи чекор напред во дијалогот со Бугарија пред самитот ЕУ-Западен Балкан и Европскиот совет, најавен за последната недела од овој месец во Брисел“, се вели во соопштението на претседателскиот кабинет.
Во однос на прашањето за евентуалното вметнување на бугарските предлози во преговарачката рамка со ЕУ, како што наведуваат од Кабинетот, претседателот смета дека утврдувањето на конечниот текст и усвојувањето на преговарачката рамка за која било држава е процес за кој е потребен целосен консензус меѓу земјите членки на Унијата, а основата врз која се утврдува самата рамка е европското законодавство, каде постојат правила, но и пракса, за тоа што може, а што не може, да биде дел од рамката.
„Преговарачката рамка што ќе ја усвои ЕУ мора да биде одобрена од нашата земја, по што и формално би започнал процесот што ќе доведе до почеток на преговорите за влез во ЕУ“, велат од кабинетот на македонскиот претседател во одговор на прашање на МИА.
Бугарската новинска агенција БГНЕС во вторникот објави и дека на последниот коалициски совет на 27 мај се разговарало за заедничка посета на бугарскиот претседател Румен Радев, бугарскиот премиер Кирил Петков и тамошната министерка за надворешни работи Теодора Генчовска на Франција. Според учесниците на Коалицискиот совет, се очекувало таму да биде одобрен предлогот на претседателот Макрон, со што ќе се укине ветото за почеток на преговорите за членство на РС Македонија во ЕУ.
Шефот на бугарската држава Радев денеска ја отфрли можноста за учество на ваква средба.
„Нема напредок за отворените прашања меѓу Софија и Скопје, така што нема услови за мојата посета на Париз на претседателот Макрон. Сакам да видам вистински резултати. Ја ценам посветеноста и напорите на нашите европски партнери“, рекол Радев.