Манчестер сити го купи Матеус Нунес од Вулверхемптон на Етихад за 62 милиони евра во летниот преоден рок 2023. Само оваа сезона, Пеп Гвардиола му смени шест позиции на теренот. Тој објасни зошто решил помалку да го користи во средниот ред, иако игра во таа линија за португалската репрезентација и иако му даде осум натпревари оваа сезона на таа позиција.
Нунес сезонава играше за Сити на сите три позиции на левата страна, како дефанзивен и офанзивен играч за врска, како и десен бек и на десната страна во средниот ред. На повеќето натпревари, 11 од 33, на кои настапи, пополни место на десната страна на бековската линија. На последниот натпревар играше и како десен бек. Сити играше како гостин кај Јунајтед и одигра 0:0, а 26-годишниот Нунес ги одигра сите 90 минути.
„Тој ја има потребната физичка способност за да стане добар десен бек. Мислам дека не може да биде доволно добар во халфовската линија бидејќи не е доволно паметен и смирен. Тој е неверојатно вешт и многу учи на позицијата десен бек. Многу ни помогна“, изјави Гвардиола по дербито во Манчестер.
Португалецот со бразилски корени пред да пристигне во Сити од Вулверхемптон настапуваше за Есторил, Ерисеиренсе и Спортинг. Тој израснал во фавелите на Рио де Жанеиро идолизирајќи го Роналдињо, а со мајка му и очувот се преселил во Португалија кога имал 13 години.
Пред шест години, тој работеше во семејната пекара во гратчето Ерицерија, недалеку од Лисабон, одеше на тренинзи во Спортинг и се надеваше дека еден ден нешто ќе му се „посреќи“.