Русија претпоставува дека Гренланд е данска територија, изјави денес портпаролот на рускиот претседател Дмитриј Песков.
„Забележуваме многу контрадикторна ситуација. Претпоставуваме дека Гренланд е територија на Кралството Данска. Слушнавме изјави и од Данска и од самиот Гренланд дека Гренланд нема намера да биде продаден на никого. Исто така, слушнавме изјава од Вашингтон дека Вашингтон формулира парична понуда за стекнување на Гренланд во една или друга форма“, рече Песков, пренесува РИА Новости.
Тој ја нарече ситуацијата околу Гренланд необична и вонредна.
„Ситуацијата е необична, дури би рекол вонредна од гледна точка на меѓународното право. Но, од друга страна, со оглед на тоа што претседателот Трамп е во Вашингтон, тој самиот рече дека меѓународното право не е приоритет за него. Затоа, ситуацијата се развива по различна траекторија“, рече Песков.
Како што изјави, Русија, како и остатокот од светот, ја следи ситуацијата во врска со Гренланд.