Пет лица се осудени за расистички навреди кон напаѓачот на Реал Мадрид, Винисиус Жуниор, за време на натпревар. Ова е значајна прва одлука во Шпанија за осудување на расистичките навреди на фудбалски стадион како злосторство од омраза, објави Ла Лига.
Во декември 2022 година, бразилскиот репрезентативец Винисиус бил навредуван за време на победата на Реал Мадрид од 2-0 над Ваљадолид, додека минувал покрај навивачите откако бил заменет на стадионот „Хозе Сориља“. Судот во Ваљадолид ги осуди петтемина сторители на една година затвор и парични казни од 1.080 до 1.620 евра. Затворските казни беа заменети со условни казни, под услов да не извршат никакво кривично дело во следните три години, а им е забрането и да присуствуваат на натпревари во истиот период.
„Благодарение на напорите на Ла Лига, која поднесе жалба и првично дејствуваше како единствен обвинител – подоцна им се придружија играчот Винисиус и Реал Мадрид, како и канцеларијата на јавниот обвинител – беше постигнато ова решение“, се вели во соопштението на Ла Лига.
„Оваа судска одлука претставува невидена пресвртница во борбата против расизмот во спортот во Шпанија, каде што досега одлуките се занимаваа со однесување спротивно на моралната пристојност со расистички отежнувачки фактор. Фактот дека оваа пресуда експлицитно се однесува на злосторства од омраза што вклучуваат расистички навреди ја зајакнува пораката дека нетолеранцијата нема место во фудбалот.“
Затворските казни под две години за ненасилни кривични дела во Шпанија без претходни пресуди ретко резултираат со ефикасно спроведување на санкциите.
Во јуни минатата година, тројца навивачи на Валенсија беа осудени на осум месеци затвор поради навредување на Винисиус со „извици, гестови и скандирања што се однесуваат на бојата на неговата кожа“.
Во септември, навивач кој расистички ги навредуваше Винисиус и играчот на Виљареал, Самуел Чуквезе, на два натпревари на Мајорка во 2023 година, беше прогласен за виновен и доби условна казна. Навивачот доби условна казна од 12 месеци откако се извини во писмо до Винисиус и помина обука против дискриминација, но исто така му беше забрането да присуствува на стадиони во траење од три години.