„И посакувам на новата влада успех со надеж дека ќе ја исполни својата најважна задача – одржувањето фер избори“, објавил поранешниот премиер на Бугарија и екс-лидер на „Продолжуваме со промените“, Кирил Петков, откако во текот на вчерашниот ден беше избрана техничка влада кај нашиот источен сосед.
Петков во својата објава се осврнал и на односите со Македонија и францускиот предлог.
„Кога го поддржавме францускиот предлог за Северна Македонија, бевме обвинети дека ги предадовме националните интереси на Бугарија, па дури и номинално бевме отстранети од власт поради тоа. Денес, сите зборуваат за тоа колку е добро што целата Европска Унија ги штити интересите на Бугарија“, објавил, меѓу другото, поранешниот бугарски премиер.
Процесот на пристапување е сопрен, а напредокот во клучните области, особено владеењето на правото и борбата против корупцијата, е недоволен. Со оваа порака, известувачот на Европскиот парламент за Македонија, Томас Вајц, го отвора годинешниот нацрт-извештај за земјава, кој на 26 февруари ќе го презентира пред Комитетот за надворешни работи на Европскиот парламент.
Во документот се нотира дека Македонија се наоѓа во тешка позиција, со застој во пристапниот процес, ограничени административни капацитети и недостиг од долгорочна политичка посветеност. Вајц повикува на нова итност и опипливи резултати од Владата и парламентарното мнозинство.
Посочува дека не е постигнат напредок во однос на уставните измени, поради загриженост за потенцијални дополнителни билатерални блокади или барања од Бугарија и смета дека е потребно зголемување на политичка волја од двете страни за да се надмине овој ќорсокак.